Sontgaclau ils 04-12-2004
Era uonn essan nus serimnai gia la sonda avonmiezdi per semtgar ils sitgets e las tortas pils affons. Damai che la participaziun era gronda ei quella caussa ida pli spert ch' auters onns. La sera essan nus serimnai en halla plurivalenta. Sco Sontgaclau era alla radunonza generala Stephan Hänggi vegnius elegius. Damai ch' ei ha giu memia bia casas per in Sontgaclau ha Joel Bisquolm, che haveva semess a disposiziun sco reserva, fatg il secund Sontgaclau. Sco fumegls alvs ein Angela Alig, Carin Coray, Silvana Menzli e Bruno Cadruvi stai a disposiziun. Bruno Cadruvi ha supriu spontan il post sco fumegl alv damai che Cherry Ann Stoffel ei buca vegnida. Sco fumegls brins ein Reto Cavegn e Duri Coray sco decidiu alla radunonza generala stai a disposiziun. Suenter nies viadi en mintga casa essan serendi suenter aunc esser stai spert ell' Alpina el Sulegl e havein magliau las pizzas che havevan fadigiau. Las pizzas e las bowlas ch' ein vegnidas fatgas ein stadas bunas. Igl ei stau ina legra sera e la fiasta ell' ustria ei era gartegiada.

Turnier da ballapei a Sedrun ils 18-09-2004
Ils 18 da settember ei noss' uniu stada si Sedrun a dar cun tier il turnier da ballapei. Il turnier vegn organisaus mintg' onn dall' uniun da giuventetgna Sedrun. Nus essan stai presents cun duas "fermas" equipas. Nossas equipas han pudiu enquals giugs mo tochen il davos ha ei buc tunschiu per nus da vegnir el final, q.v.d. il final pign pign. Denton havein nus lu tuttina saviu prender encunter la sera ella MAD WALSTREET si Dieni 2 pucals. Nus havein gudiu igl entir di ed il sulegl ha sclariu sco bunamein mai quella stad. La sera havein naturalmein festivau sco sauda nies success dil di.

Viadi el Tessin ils 29-07-2004 tochen ils 01-08-2004
Ils 29 da fenadur ha noss' uniun fatg in viadi el Tessin. La gievgia sera essan serendi cun autos privats naven da Ruschein encunter il Tessin. Damai ch' ils biars plaz da campar eran gia occupai, essan nus i a Monticello en curtgin tier parents da Willi e Bruno Cadruvi a campar. Suenter esser stai a far bogn, gudiu la veta, i en sortida els marcaus dil contuorn, essan nus lu baul la dumengia puspei turnai a casa. Igl ha dau in pèr bunas fiastas ed igl ei stau bials dis el Tessin.

Novizs ils 26-06-2004
En noss' uniun da giuventetgna Ruschein ein Angela Alig, Carin Coray, Silvana Menzli e Cherry Ann Stoffel (da Ladir) vegni pri si. La damaun ein in pèr (fetg paucs) i si tiel lag da Werner a baghegiar si tut per la fiasta. La sera essan serimnai amiez vitg ed essan naven da leu lu i cun entgins autos privats si tiel lag da Werner. Suenter haver buiu e magliau enqual caussas han il giugs giu liug. Ils giugs ein stai creativs, leghers e mintgin ha giu enzatgei da rir. Suenter ha mintgin aunc biu siu quantum, in pèr era da memia mo gliez sauda tier quella fiasta. Ils biars ein lu serendi baul la damaun encunter casa. Tschels han durmiu en nossa tenda da militär. Nus havein passentau ina biala e legra fiasta si tiel lag da Werner. Il suentermiezdi ein in pèr lu aunc i ensi per far empau uorden e guder in per bubrondas ch' eran restadas.

Di da skis ils 06-03-2004
Sco usitau havein nus era uonn puspei fatg all' entschatta dil meins mars in di da skis. Nus essan i cun posta vi Laax e leu si Crap Sogn Gion. L' aura era sco il bia che noss' uniun va cun skis buc aschi buna. Mo nus havein fatg il meglier ord quella situaziun e fatg ina pausa. La pausa ei denton stada ualti liunga e quei ell' ustria dil Vorab. Tard il suentermiezdi essan nus lu i si Crap Masegn e naven da leu giu Ruschein.

1. Turnier da ballapei a Ruschein ils 10-01-2004
Ils 10-01-2004 ha noss' uniun ensemen cun l' uniun sportiva Ruschein organisau igl emprem turnier da ballapei en halla plurivalenta a Ruschein. L' organisaziun pil turnier ha custau ad in pèr da noss' uniun ina massa gnarva e temps liber. Al di dal turnier ha denton tut funcziun bein. Igl ha giu 13 equipas che han priu part. Pudiu ha l' equipa da Schluein (tgapatalpas), secunds ei in' equipa da Cuera vegnida e tiarz ei l' equipa da Siat vegnida (6+1). Damai che nus havein fatg ustria duront il di e la sera bar ha ei era adina dau la pusseivladad da magliar ni beiber zatgei. Quei ei denton mo stau pusseivel damai che tut ils commembers dall' uniun han gidau cun fetg sufficient. Il turnier ei staus in success e tut las equipas han schau plascher quei di. Ella bar eis ei buc marschau aschia sco nus havevan spitgau, denton bischava ei e las vias eran buca segiras. Prima fiasta ha ei denton tuttina dau.

Silvester / Daniev 2003/2004
Ils 31-12-2003 havein nus fatg sco ils davos onns in di da skis si Crap Sogn Gion. Damai che l'aura era buca "excellenta" havein nus passentau la gronda part dil di ell' ustria. Suenter haver buiu enqual caussas e haver giugau in pèr jass essan nus lu serendi encunter casa.
Las 20.00 uras essan nus lu puspei vegni ensemen ell' Alpina per magliar tscheina. Suenter ch' ils biars havevan avunda ed ei vegneva buc surviu dapli havein nus lu festivau las davosas uras digl onn vegl ensemen. Tuttenina era ei gia igl onn 2004 e nus havein festivau vinavon,
all' entschatta ell' Alpina lu el Sulegl e lu puspei ell' Alpina empau vi e neu, in pèr leu ed in pèr cheu. Mo encunter la damaun havein lu puspei anflau in l' auter ed essan lu serendi tuts ensemen per las casas a giavischar in bien niev onn e festivar vinavon. Igl ei stau ina emperneivla fiasta e naturalmein fetg legher.

Igl actuar: Curdin Cavegn