Sontgaclau ils 03-12-2005
Sco tschels onns era essan nus serimnai gia la sonda avonmiezdi per semtgar ils sitgets e las tortas pils affons. La sera essan nus serimnai en halla plurivalenta. Sco Sontgaclaus eran gia da radunonza generala Stefan Cavegn e Roman Darms vegni elegi. Sco fumegls alvs ein Melanie Cadruvi, Nicole Cadruvi, Maria Coray e Ramona Cajochen e sco fumegls brins ein Ivan Arpagaus e Philipp Niederberger stai a disposiziun. Suenter nies viadi en mintga casa essan serendi ell' Alpina e havein survegniu ils "schnitzelbrots" ed entginas gervosas che havevan maritau. Nus havein passentau ina biala e legra fiasta ell' Alpina.

Viagiada silla tegia da Maighels ils 10-09-2005 + 11-09-2005
La sonda ils 10 da settember 2005 essan serimnai tiel parcadi baselgia e naven da leu essan carrai cun autos privats tochen sigl Alpsu. Davend' igl Alpsu essan nus i a pei tochen si tier la tegia da Maighels. Arrivai si leu ha ei dau ina buna tscheina. Suenter la tscheina havein fatg in pèr giugs e silsuenter gudiu la sera.
La dumengia ils 11 da settember 2005 essan lavai baul e spassegiai tochen tiel lag Tumma. Naven da leu ein in pèr directamein viagiai tier la tegia Badus e tschels ein i encunter il Rossbodenstock. Sin lur viagiada ein quels ch' ein i encunter il Rossbodenstock denton vegni en in urezi ed ein lu era i ella tegia Badus. Suenter haver pussau empau essan lu puspei i encunter igl Alpsu nua che havein lu aunc buiu in e naven da leu cugl auto a casa.

Sentupada Breil + Ruschein cun giug e grillada ils 27-08-2005
La sonda ils 27 d' uost 2005 essan serimnai la damaun en halla plurivalenta per preparar tut per la fiasta cun quels da Breil. Entgins ein stai fatschentai cun las maglias e bubrondas
ch' eran vegnidas empustadas ni organisadas e tschels han giu da baghegiar si tut Entadavos ni si Plontabuora. Damai ch' ei era denton tut vegniu organisau bein dalla gruppa da lavur existent ord Maurus Blumenthal, Willi Cadruvi, Carin Coray e Duri Coray ed igl agid dils commembers ei tut stau preparau qu che quels da Breil ein arrivai. Sco beinvegni ha ei dau in aperitif avon halla plurivalenta. Suenter haver midau o in pèr plaids in cun l' auter a nies president Sephan Hänggi fatg in cuort plaid. Vinavon eis ei iu culs giugs ch' ein vegni organisai dalla gruppa da lavur e ch' ein stai fetg leghers. Qu che tuts ein arrivai Entadavos haveinsa entschiet a grillar e far fiasta ensemen. La fiasta ei gartegiada e quels da Breil han schau plascher tier nus. La dumengia suentermiezdi havein fatg uorden.

Turnier da ballapei a Sedrun ils 06-08-2005
Ils 6 d' uost ha noss' uniu priu part al turnier da ballapei a Sedrun. Il turnier vegn organisaus mintg' onn dall' uniun da giuventetgna Sedrun. Nus essan stai presents cun duas equipas. Nossas equipas han pudiu enquals giugs, deplorablamein denton era piars in pèr ed aschia ha ei era uonn buc tunschiu da vegnir el final. La sera havein nus lu tuttina saviu prender encunter ella MAD WALSTREET si Dieni 2 pucals. Nus havein gudiu quei di e la sera havein naturalmein festivau empau.

Novizs ils 25-06-2005
Uonn havein nus astgau prender si 10 novs commembers en noss' uniun.
Annada 1988
· Donat Bischof sevestgius sco Homer Simpson
· Gian Caminada sevestgius sco Fred Feuerstein
Annada 1989
· Ivan Arpagaus sevestgius sco Aladin
· Valentina Bischof sevestgida sco Biene Maja
· Maria Coray sevestgida sco Marge Simpson
· Melanie Cadruvi sevestgida sco Kleopatra
· Nicole Cadruvi sevestgida sco Vilma Feuerstein
· Ramona Cajochen sevestgida sco Prinzessin (Aladin)
· Philip Niederberger sevestgius sco Cesar
· Arthur Selmanaj sevestgius sco Willi (Bienne Maja)
La damaun ein entgins i si Run Giosch a baghegiar si tut per la fiasta. La sera essan serimnai amiez vitg. Ils novizs eran sevestgi fetg bein suenter lur rollas che la suprastonza ha partgiu tier ad mintgin dad els. Naven da miez vitg essan carrai cun autos privats si Run Giosch. Suenter haver buiu e magliau enqual caussas han il giugs giu liug. Ils giugs ein stai creativs, leghers e mintgin ha giu enzatgei da rir. Suenter ha mintgin aunc biu siu quantum, in pèr era da memia mo gliez sauda tier quella fiasta. In pèr ein serendi la notg da sonda sin dumengia encunter casa, auters han durmiu en nossa tenda da militär. Nus havein passentau ina biala e legra fiasta si Run Giosch. Il suentermiezdi ein in pèr lu aunc i ensi per far empau uorden e guder in pèr bubrondas ch' eran restadas.

Cuorsa el ed ella ils 05-03-2005 a Breil
La cuorsa el ed ella vegn mintg' onn menada atras dall' uniun da giuventetgna Breil. Els envidan mintg' onn en in' autra uniun da giuventetgna. Uonn han els envidau en noss' uniun.
Nus essan vegni ensemen las 14.15 uras tiel parcadi baselgia ed essan naven da leu i cun autos privats encunter Breil. Allas 15.00 uras ha l' uniun da giuventetgna Breil lu fatg in beinvegni a nus ed han entschiet en cun giugs ch' ei havevan preparau. Ils giugs ein stai fetg leghers e suenter ch' ils biars havevan empau freid essan nus i en ina bar a sescaldar.
Suenter haver sescumiau, buiu in dus e paterlau empau essan nus i ell' ustria Mulin a magliar tscheina. Suenter la tscheina han in pèr dall' uniun da Breil aunc menau si in pèr scenettas
ch' ein stadas fetg legras. La tscheina ei stada grondiusa ed ei ha suenter aunc dau in biala fiasta cun l' uniun da giuventetgna Breil el Mulin.

2. Turnier da ballapei a Ruschein ils 15-01-2005
Ils 15-01-2004 ha noss' uniun organisau il 2. turnier da ballapei en halla plurivalenta a Ruschein. L' organisaziun per asch' in turnier ei pli gronda che quei ch' entgins mettan avon. Cugl agid dalla gronda part dils commembers ha quei denton funcziunau bein. A nies Turnier han 20 equipas (2004 / 13) priu part (naven da Cuera sur Lumnezia tochen Trun). Pudiu ha l' equipa Irriducibili (Trun), secunds ei l' equipa Spongebob Schwammkopf (Glion e contuorn) vegnida e tiarz ein ils Calimeros (Schluein e contuorn) vegni. Damai che nus havein fatg ustria duront il di e la sera bar ha ei era adina dau la pusseivladad da magliar ni beiber zatgei. Quei ei denton mo stau pusseivel damai che tut ils commembers dall' uniun han gidau cun fetg sufficient. Il 2. turnier ei staus in success e tut las equipas han schau plascher quei di. La bar ei buca marschada aschia sco nus havevan spitgau, quei ei denton era stau igl onn avon il cass. Prima fiasta ha ei denton tuttina dau. La dumengia cura ch' ei era da far uorden han denton fetg paucs commembers priu temps da vegnir a gidar.

Silvester / Daniev 2004/2005
Ils 31-12-2004 havein nus fatg sco ils davos onns in di da skis el territori da skis Flem, Laax e Falera. Damai che l'aura era buca "excellenta" havein nus passentau ina part dil di ell' ustria. Encunter auters onns essan nus denton aunc stai bia cun skis. Suenter haver buiu enqual caussas e haver gudiu il di essan nus lu serendi encunter casa.
Las sera essan nus vegni ensemen tiel parcadi baselgia per serender cul bus encunter Val. Domenic (igl amitg da Ramona) ei staus prompts da surprender la responsabladad ed ei ius cul bus. Ell' ustria DIAVOLO zum Tüfelstei ha mintgin pagau 99.-- frs e ha per quels daners saviu magliar e beiber (bier, vin e bubrondas senza alcohol) ton sco ch' el leva. Suenter che tuts havevan avunda ed entgins levan buc pli star en quell' ustria essan nus lu i cul bus tier ina "disco" enta Val. En quella disco essan nus denton buc stai ditg perquei ch' entgins havevan giavischau dad ir encunter Ruschein. Circa las 3.30 uras eran nus puspei a Ruschein e havein festivau leu brav vinavon. Cura ch' ei vegneva plaunet clar essan nus lu i a giavischar in bien niev onn per las casas. La fiasta enta Val ei buc gartegiada sco che biars havevan mess avon, denton havein festivau endretg qu che nus eran puspei a Ruschein.

Igl actuar: Curdin Cavegn