Sontgaclau ils 9-12-06
La sonda avonmiezdi essan nus serimnai allas 10:00 en halla plurivalenta per preparar ils sitgets e las tortas per ils affons. La sera essan sentupai allas 18:45 per sevestgir e smincar ils Sontgaclaus ed ils fumegls. Sco Sontgaclau eran Duri Coray e Gian Caminada semess a disposiziun dalla radunonza generala. Gian Marco Menzli ha semussau fetg segideivels ed ei seglius en per Duri damai che lez haveva stendiu ils ligioms. Sco fumegls alvs ein Melanie Cadruvi, Nicole Cadruvi, Selina Caderas e Marina Caduff e sco fumegls brins ein Marco Cavegn e Marc Niederberger stai a disposiziun. Per l'emprema gada havein nus era cumpriu las casadas da Ladir en nies tur da Sontgaclau.
Silsuenter essan serendi ell'Alpina nua ch'ei ha dau in "Schnitzelbrot", gervosas ni ina bubronda tenor giavisch per mintgin. Ell'Alpina havein nus passentau ina liunga e legra sera.

L'actuara: Cornelia Vinzens

7. Turnier da ballapei a Sedrun ils 16-09-2006
Ils 16-09-2006 ei noss' uniun stada si Sedrun tier il turnier da ballapei che vegn organisaus mintg' onn dall' uniun da giuventetgna Sedrun. Uonn essan nus stai presents cun in' equipa. Noss' equipa ei stada ina dallas meglieras els emprems giugs, denton ha ei sil davos buc tunschiu per il giavischau. La sera essan stai sco usitau el BADUS a magliar pizza. Tut ils/las ballapeists/as eran buc pli presents/as alla tscheina denton han quels ch' eran leu giu fetg legher. La sera havein aunc saviu prender encunter ella MAD WALSTREET si Dieni ina medaglia. Il turnier ha plaschiu e la fiasta la sera respectiv la notg ella MAD WALSTREET ei era gartegiada.

Viadi a Croatia
Sco votau alla radunonza da primavera ha Maurus Blumenthal organisau cun agid da differents commembers il viadi a Croazia.
Suenter haver partiu ora flyers cun differents datums ei il viadi vegnius fixaus sin ils 6 tochen ils 10-09-2006. 12 persunas han s' annunziau pil viadi.
La mesjamna ils 06-09-2006 circa allas 22.00 uras essan carrai cun autos privats tochen Bellinzona. Leu havein spitgau sil tren ch' ei ius allas 01.30 uras tochen Venezia. Arrivai suenter paucas uras durmir circa las 8.30 a Venezia spitgavan ils bus organisai gia sin nus. Suenter circa 11 uras viadi essan lu arrivai en nossa residenza cul num HORIZONT ella vischinonza da Pula. Cura che tuts havevan retratg lur combras eis ei lu era buc iu ditg e la gronda part leva ir aschi spert sco pusseivel tier la riva dalla mar. Las combras eran buc las pli comfortablas mo gliez havevan nus era buca spitgau. Suenter haver gudiu la mar, magliau zatgei e buiu enqual caussa ella calira da Croazia ei la gronda part lu ida a semtgar per len sortida. Nus havevan quintau che len sortida seigi fetg attractiva a Pula e contuorn, denton havein gia l' emprema sera stuiu constatar che quei ei buc aschia il settember a Pula e contuorn. Il venderdis ils 08-09-2006 essan i gia baul la damaun al port da Pula. Leu havein priu part ad ina excursiun cun bastiment. Damai ch' ei ha dau empau vin gratuit e pèsch eis ei stau fetg legher ed intressant. Il bastiment ha suenter in mument fatg ina pausa a Rovinj, leu havein saviu ir a mirar empau il marcau. Suenter haver cumprau empau uorden tier las fieras da rauba vedra ed ir cun velo ei il bastiment lu ius vinavon tier ina riva. Enzaconts han fatg bogn leu, auters han nezegiau la caschun da durmir in pèr uras. Circa allas 19.00 uras essan puspei arrivai a Pula ed i en nossa residenza a semtgar per la sera. Cun quei ch' eran stai la sera avon mo el contuorn dalla residenza HORIZONT en sortida e leu marschavi nuot havein quintau ch' ei marschi dapli a Pula sez. Enzacons han anflau leu quei ch' ei encurevan ed han gudiu la notg, auters ein gia i pli baul anavos tier la residenza. La sonda essan stai a Pula per cumprar empau e mirar il marcau. La sera essan puspei stai el contuorn da nossa residenza en sortida. Tuttenina era ei gia dumengia ils 10-09-2006 e nus havein stuiu ir anavos tochen a Trieste (Italia). A Trieste havein aunc giu empau temps da magliar zatgei ed ir a spassegiar el marcau. Els trens naven da Trieste tochen Bellinzona havein fatg ir il temps cun dar jass, tschintschar tup, durmir ed aschia vinavon. Naven da Bellinzona essan lu carrai cun autos privats sur il Lucmagn, enquals era zaco auter, tochen Ruschein. Il viadi ei staus fetg bials ed intressants. Il sulet negativ, sch' ins sa di quei aschia, ei stau ch' ei marschava buc bia en sortida a Pula e contuorn.

Novizs ils 03-06-2006
Uonn havein nus astgau prender si 5 novs commembers en noss' uniun.
Annada 1990
· Selina Caderas sco Wladimir Putin
· Marina Caduff sco Christoph Blocher
· Cindy Caminada sco George W. Bush
· Marco Cavegn sco Micheline Calmy-Rey
· Marc Niederberger sco Angela Merkel
La damaun allas 9.30 uras tochen tard viaden el suentermiezdi ein gia enquals da noss' uniun i si Bual (Ladir) a baghegiar si tut per la fiasta. La sera essan serimnai amiez vitg allas 18.30. Ils Novizs eran sevestgi fetg bein suenter lur rollas che la suprastonza ha partiu tier a mintgin dad els. Suenter haver fatg enqual fotografia culs novizs essan lu carrai cun autos privats si Bual (Ladir). Leu havein buiu in per gervosas ni autras auas alcoholisadas e suenter han ils giugs entschiet. Ils giugs ein stai fetg creativs (il parcur ei staus il hit), leghers e mintgin ha giu zatgei da rir. Suenter ch' ils giugs ein stai a fin ha mintgin aunc buiu siu quantum, enzaconts era da memia, auters anflav' ins buc pli damai ch' ei ein tuttenina sedurmentai zanua, mo da quella fiasta ston ins quintar cun tut. Baul ni tard ha mintg' in anflau la via encunter casa. Enquals han passentau l' entira notg ed era la gronda part dalla dumengia si Bual. La dumengia suentermiezdi eis ei vegniu fatg uorden. Nus havein passentau ina biala e legra fiasta si Bual.

Di da skis ils 04-03-2006
Sco quei ch' igl era usitau havein nus uonn puspei fatg all' entschatta dil meins mars in di da skis el territori da skis Flem, Laax e Falera. L' aura era miserabla ed aschia han mo fetg paucs commbers (circa 5) priu part a quell' occurenza. Quels ch' ein stai han denton fatg il meglier ord tut, ein i neiv nova e stai ualti bia ell' ustria. En mintga cass havess l' aura saviu esser megliera mo era aschia eis ei stau in legher di.

3. Turnier da ballapei a Ruschein ils 14-01-2006 (Gliesta da rangaziun)
Ils 14.01.2006 ha noss' uniun organisau il 3. turnier da ballapei en halla plurivalenta a Ruschein. L' organisaziun pil turnier atras la suprastonza cun igl agid dalla gruppa da lavur ha funcziunau fetg bein. A nies turnier han 24 equipas (2005 / 20, 2004 / 13) priu part (naven da Cuera sur Lumnezia tochen Trun). Dapliras equipas savein strusch schar vegnir a nies turnier damai che las equipas ston lu spitgar memia ditg da dar lur proxim giug. Cun 24 equipas ei quei denton aunc iu relativ bein.
Damai che nus havein fatg ustria e bar (danovamein el foyer) ha ei era adina dau la pusseivladad da magliar ni beiber zatgei. Quei ei denton mo stau pusseivel damai che tut ils gidonters dall' uniun han gidau cun fetg sufficient.
Ils onns vargai ha ei percletg mai dau pli gronds accidents, quei ei uonn denton stau auter. Il final denter Lumbrein e Rabius ei schizun vegnius interruts damai ch' in da Lumbrein ha fatg mal ed ha stuiu ir en spital a schar cuser sia blessura. Damai ch' il final ei vegnius interruts havein nus giu negin victur. Quels da Lumbrein e quels da Rabius ein denton secunvegni da trer la sort. Da trer la sort han quels da Rabius fatg secunds ed ein aschia era vegni secunds. Il victurs dil turnier da ballapei a Ruschein igl onn 2006 ein aschia quels da Lumbrein stai.
Il 3. turnier ei stau in success e la gronda part dallas equipas han schau plascher quei di. Prima fiasta ha ei era uonn dau. Schizun la dumengia cura ch' ei era da far uorden ein in toc dapli commembers stai a gidar ch' igl onn avon.

Silvester / Daniev 2005/2006
Ils 31-12-2005 havein nus fatg sco usitau in di da skis el territori da skis Flem, Laax e Falera. Damai che l'aura era buca "excellenta" havein nus passentau ina part dil di ell' ustria. Encunter auters onns essan nus denton aunc stai bia cun skis. Suenter haver buiu enqual caussas e haver gudiu il di essan nus lu serendi encunter casa.
Las 20.00 uras essan nus lu puspei vegni ensemen ell' Alpina per magliar tscheina. Ei ha era schon dau onns che daplirs commembers han priu part a quella tscheina, denton han quels
ch' ein stai buc schau lavagar la fiasta da quei ed han gudiu la sera, notg ed era las empremas uras digl onn niev ell' Alpina. La damaun a bun' ura ein lu era quels ch' ein stai ordeifer anflau la via el vitg da Ruschein ed aschia essan lu serendi da casa tier casa a giavischar in bien niev onn. Sco tut ils onns han tuts anflau baul ni tard la via a casa, entgins cun pli gronds problems ch' auters, denton sauda quei tier quella fiasta. Igl ei stau ina biala e legra fiasta.

Igl actuar: Curdin Cavegn