Sontgaclau ils 8-12-08
Sco usitau essan nus serimnai la sonda avonmiezdi allas 10 en halla plurivalenta per semtgar ils sitgets e las tortas per ils affons. La sera han nos dus turs, cun ils Sontgaclaus Duri e Donat, entschiet punctual allas 19:00. Gia sco igl onn vargau, essan nus era uonn stai si Ladir ellas casadas. Encunter las 22:00 eran omisduas gruppas atras cun lur tur e nus essan sentupai ell'Alpina. Leu ha ei naturalmein puspei dau in "Schnitzelbrot" per mintgin e gervosas sponsoradas dalll'uniun.
Nus vein passentau ina legra sera e notg ell'Alpina.

Turnier da ballapei Sedrun ils 15-09-07
La sonda endamaun ein entgins dalla giuventetgna sentupai allas 7:30 amiez vitg per serender si Sedrun. En tut han 26 gruppas priu part da quei turnier. Igl ei stau in bi e cauld gi da buna cumpignia. Nossa gruppa da Ruschein e Ladir ei la fin finala vegnida sil 9avel rang. Gudignau ha la gruppa da Sagogn. Silsuenter ha ei naturalmein dau ina liunga e legra fiasta ella bar en halla. Cun bus da notg ein tuts lu turnai a casa.

Sentupada cun l'ug Rabius ils 11-08-07
La sonda avonmiezdi allas 9:00 essan nus sentupai per far davosas preparativas. Baghegiar si la bar, preparar ils giugs etc. Suentermiezdi essan nus sentupai allas 13:30 per spitgar l'arrivada dils da Rabius. Ina mes'ura pli tard ein els lu arrivai cun in bus. Deplorablamein han pli paucs che spitgau separtizipau a quella sentupada. Als giugs han ca. 6 commembers dalla ug Rabius priu part. Stai alla fiasta ein 9. Da Ruschein e Ladir han 15 fatg part dils giugs. Avon ils giugs ha ei aunc dau in apero e Martin Blumenthal ha fatg in plaid da beinvegni. Allas 15:00 havein nus entschiet cun ils giugs che consistevan da differents posts che menavan tras gl'entir vitg. Las gruppas existevan mintgamai ord commembers da omisduas uniuns. Denter gl'auter eis ei stau da trer paliats, far degustaziuns e dar en guottas. Suenter ils giugs ha ei dau ina buna tscheina cun grill e salatas. Emprema ha la gruppa da Nicole Cadruvi, Roman Darms ed Ursin Lutz fatg. Silsuenter ei la fiasta ida libra. El tschalèr da schurmetg ha ei dau pusseivladad da durmir per tgi che pudeva bu pli.
La damaun ha ei aunc dau in ensolver cun "ghipfels". Silsuenter ein era ils davos dalla ug Rabius serendi encunter casa. La fiasta ei gartegiada, malgrad che paucs han separtizipau. Suentermiezdi ein ca. 10 commembers stai a far uorden.
Al comité, quei fuss Duri Coray, Marco Cavegn, Bruno Cadruvi e Martin e Gion Blumenthal, che ha organisau e menau atras quella sentupada, lessel jeu engraziar el num dall'entira ug Ruschein/Ladir.

Novizs ils 23-06-07
Uonn havein nus astgau prender si 3 novs commembers en noss'uniun.
· Sandro Bleuler
· Silvan Caduff
· Pablo Cadruvi
La sonda allas 10.00 essan nus serimnai amiez vitg e carrai cun autos privats si Bual. Leu havein nus preparau ils giugs per ils novizs, baghegiau la bar, fatg si la tenda ed aunc fatg autras preparativas. La sera essan puspei serimnai allas 18.30 amiez vitg per retscheiver ils treis novizs. Dalla davosa radunonza havevan nus sedezidiu per il tema "Wild West". Ils novizs eran sevestgi bein. Silsuenter ein schi biars sco pussseivel seschmaccai sin il "Howdy Taxi" (mulli) e nus essan semess sin via encunter Bual. Sco emprem vein nus magliau zatgei e suenter havein beinspert entschiet cun ils giugs. Entschiet havein cun in parcour, sco secund in giug da cartas, sco tierz seglir cun suga e sco davos sepresentar avon ils commembers dall'uniun. Ils giugs han dau bia da rir e mintgin ei sedevertius. Fiasta havein nus fatg tochen ch'il sulegl ei puspei semussaus l'auter gi. Entgins ein ir a pei a casa, auters han durmiu en tenda. L'auter gi ein 15 commembers, denter gl'auter era ils novizs, stai si Bual a gidar a far uorden e beiber ils davos biers.
Nus havein passentau ina biala e legra fiasta e vein giu il cletg d'eleger il sulet bi gi senza plievgia dapi in'jamna.

4. Turnier da ballapei a Ruschein ils 13-01-07 (Gliesta da rangaziun)
L'uniun da giuventetgna ha era quest'onn organisau in turnier da ballapei en halla plurivalenta. Sco decidiu dalla radunonza generala han Nicole Cadruvi e Martin Blumenthal segidau cun tier l'organisaziun. S'annunziau havevan 20 equipas, denter quellas biaras che havevan gia priu part da nies turnier ils onns vargai. La fin finala ei il turnier vegnius menaus atras cun 18 equipas damai che 2 han gietg giu cuort avon il turnier.
Danovamein havein nus fatg ustria e bar el foyer. Ils gidonters dall'uniun han cun entginas excepziuns segidau cun pruamein en cuschina, buffet e bar.
Gl'emprem giug ha entschiet allas 13:00 ed il final ei staus ellas 22:30. Gudignau han per la secunda gada Lumbrein el final encunter Surcasti. Tiarz ha la gruppa "Bruno sa il num" da Ruschein fatg. Cumparegliau cun gl'onn vargau ha ei uonn dau negins pli gronds accidents.
Il 4. turnier da ballapei ei staus in success e biars han schau plascher quei gi. Fiasta ella bar havein nus era fatg quella gada tochen ch'il sulegl ei levaus la dumengia. Da far uorden ein biars commembers stai a segidar.

L'actuara: Cornelia Vinzens