Silvester ils 31-12-08 e Daniev ils 01-01-09
Per midar inaga vein nus decidiu dad ir uonn cun scarsola enstagl cun skis da Silvester. Damai che l’aura ei bu stada aschi buna ein mo paucs separticipai. Las persunas separticipontas ein carradas cun auto da posta el territori da skis Flem, Laax, Falera ed ein turnadas il suentermiezdi cun scursalar dalla pista naven da Crap Masegn tochen a Ladir e Ruschein. La sera essan nus serendi ell’ustria Casa Crusch per magliar tscheina. Cheu ein in per persunas dapli, numnadamein rodund 35, stadas cun dalla partida. Da magliar ha ei dau ina salata, silsuenter charbonnade cun pommes frites e lu aunc in buontad dessert. L’emprema bubronda ed il da magliar ein vegni pagai dall’uniun. Tschellas caussas ch’ein vegnidas consumadas ein vegnidas notadas sin ina gliesta e mintgin ha pagau sez sia part alla fin dalla fiasta.
Suenter vein nus cuntinuau cun nossa tradiziunala tura per las casas dils vitgs entuorn sco mintg’onn per giavischar a tuts in bien niev onn. Aschia san ins era mirar enavos uonn sin ina fiasta da Silvester e Daniev tut aparti gartegiada.

Sontgaclau ils 06-12-08
Sco tschels onns era essan nus serimnai la sonda avonmiezdi allas 10.00 en halla plurivalenta per preparar ils sitgets e las tortas per ils affons.
La sera ein ils fumegls, Sontgaclaus ed inper auters commembers arrivai allas 18.00 en halla per sepreparar per la tura. Sco Sontgaclaus han Gian Marco e Donat semess a disposiziun.
Allas 19.00 haveinsa saviu entscheiver culla tura. La gruppa da Donat ei ida en 9 casadas a Ruschein e Ladir, la gruppa da Gian Marco ha visitau 10 casadas a Ruschein.
Entuorn las 22.00 essan serendi ell’Alpina. Da magliar ha ei dau spaghettis e per la seit duas kistas pier, pagai dall’uniun. Tochen gitg ella notg e perfin ella damaun essan stai ell’Alpina e vein passentau ina
legra notg.


Igl actuar: Marco Cavegn

Viadi a Minca ils 4-09-2008 tochen ils 7-09-2008
Igl ei finalmein aschi lunsch: L’uniun da giuventetgna Ruschein e Ladir va a Minca. La sera dils 4 da settember ein 18 commembers da nossa uniun sentupai sil plaz posta a Ruschein per serender giu Cuera sil tren dallas 18:24 encunter Minca. Tuts eran da buna luna e selegravan sin in per bials gis en Tiara Tudestga. El tren vegn ei naturalmein fatg in viva. Entuorn las 23:00 essan nus arrivai a Minca sin la staziun principala. Ils dus organisaturs, Christian Casanova e Duri Coray, han lura giu il pensum dad anflar nies hotel “Wombat’s”. Quei ei gleiti stau fatg, damai ch’il hotel sesanfla mo 5 minutas a pei dalla staziun. Gleiti havein nus saviu retrer nossas combras. Las 8 giuvnas eran ensemen en ina combra ed ils 9 giuvens eran parti si en duas combras. Las combras ein fetg schubras e mintga combra ha in agen bogn e tualetta. Nus havein deponiu las valischas ed essan sentupai ella bar dil hotel. Entgins han gia l’emprema notg buc durmiu biaras uras.
L’auter gi, il vendergis, essan nus sentupai suenter in grondius ensolver allas 10:30 avon nies hotel. Nus essan caminai tochen il Marienplatz, ir a mirar la Frauenkirche e silsuenter haveinsa priu la metro entochen la Allianz Arena. Leu ha in guid menau nossa gruppa tras igl impressiunont stadion da ballapei che tschaffa datier da 70'000 aspectaturs. La Allianz Arena ei in dils paucs stadions da ballapei cun treis tribunas.
Silsuenter ei il viadi ius vinavon ella Paulaner Brauerei. Leu ha medemamein in guid raquintau a nus dils misteris da far gervosa. Suenter la tura tras la brassaria essan serendi el Biergarten ed havein tschenau combas (Haxe), ligiongias da curry, crut e massa autras spisas tipicas, naturalmein accumpignadas d’in Paulaner.
En sortida ein entgins ir el renomau Hofbräuhaus, auters ella bar dil hotel.
La sonda essans sentupai pér suentermiezdi allas 14:30. La damaun ei tgi ius a cumprar en e tgi ha durmiu ora tochen miezdi. Las 15:00 essan carrai per Minca entuorn per duas uras cun in bus turistic. Tscheina ein ils biars stai a magliar ensemen, en in tipic restaurant tudestg. Puspei ha ei dau combas, “Knödels” e crut cun pier. Mmmh…
Silsuenter havein passentau ina liunga e legra notg egl “Ostbahnhof”, nua ch’ei dat massa bars e discos.
La dumengia ein ils biars levai cun egls fetg pigns. Nus havein pachetau nossas valischas ed essan turnai a casa cun il tren dallas 12:30 naven da Minca. Las 19:00 essan arrivai a Ruschein e Ladir.
Quei ei stau in fetg bi viadi a Minca cun bia novas impressiuns ed experienzas. In cumpliment a Duri Coray e Christian Casanova per quella buna organisaziun.

Sentupada cun l'uniun da giuventetgna Rabius ils 2-08-2008
La sonda dils 2 d’uost ha l’uniun da giuventetgna Rabius envidau nossa uniun e l’uniun da giuventetgna Sagogn ella Val Sumvitg. L’idea era da sentupar, far novas enconuschientschas e far ina legra fiasta ensemen. Il sulegl ha semussau quei gi da sia pli biala vart. Da nossa uniun han 11 commembers separticipau, da Sagogn ein datier da 20 commembers stai dalla partida. Cun la posta dallas 14:00 essan nus carrai entochen Glion e da leu cun il tren tochen la staziun da Rabius. Leu han entgins dalla ug Rabius fatg in cordial beinvegni a nus e cun autos organisai essan nus carrai lunsch viaden ella Val Sumvitg. Leu era semtgau maglias, bubrondas e meisas cun bauns. Nus essan seplaccai ed havein fatg in viva. Entgins han tschentau si lur tendas per star sur notg. Duas uras pli tard han era ils da Sagogn anflau la via ella Val Sumvitg. Era per ina bar cun musica havevan ils hospitonts procurau. Nus havein grillau, buiu e passentau ina legra sera ensemen. Entgins ein aunc ir a casa la notg, auters han spitgau sigl ensolver l’autra damaun.
In grond engraziament all’uniun da giuventetgna Rabius per quella sentupada.

Novizs ils 21-06-2008
Era uonn ha la fiasta da noviz giu liug si Bual. Allas 10:00 ein ils commembers dalla ug sentupai amiez il vitg per serender cun autos privats si Bual e far entginas preparativas per la sera. Il president Duri Coray haveva fatg in plan da lavur, aschia che mintgin saveva tgei ch’el haveva da far. Entgins han installau la bar, auters han fatg si tenda ni organisau ils giugs. Da miezdi havein nus grillau e baul suentermiezdi era tut semtgau. Damai che entgins novizs eran quei gi aunc sin viadi a casa dil viadi da scola, essan sedezidi, da sentupar la sera per allas 19:30. Tschun novizs han senunziau per vegnir commembers da noss’uniun. Andri Arpagaus e Sandra Caduff ein arrivai sevestgi sco rugadur e regina la sera amiez il vitg. Gabriel Caderas, Remo Alig e Serafin Cadruvi ein vegni pér pli tard. Aschia havein nus cargau ils dus novizs sil mulli ed essan ir si Bual. Leu havein nus sco emprem priu in sitg e spitgau sin il rest dils novizs. Cura che Gabriel e Remo ein arrivai, sevestgi sco harlechin e cavalier, havein nus entschiet cun ils giugs. Suenter quater giugs stentus ha ei lu finalmein dau in diplom per mintgin. Serafin, ch’ei arrivaus pér cu ils giugs eran schon fini, ha aunc stuiu ir atras in parcour spezial avon ch’el ha survegniu siu diplom. Cunquei ha nossa uniun ussa tschun commembers dapli.
Bien e gitg essan nus stai ensemen da cuminonza si Bual e vein festivau entochen l’auter gi. La dumengia allas 13:30 ei stau da far uorden. Uonn han buca schi biars commembers segidau da far uorden sco auters onns.

5. Turnier da ballapei a Ruschein 12-01-08
Uonn ha l’uniun da giuventetgna Ruschein & Ladir organisau gia per la 5avla ga il turnier da ballapei. Era quei onn ei quell’occurenza stada in success. 22 squadras han priu part, denter gl’auter era ils victurs dils dus onns passai, las «Hontas Lumerinas» da Lumbrein. Angela Alig, Selina Caderas e Donat Bischof han segidau cun l’organisaziun. Cunquei ch’ entgnins commembers consumavan ils onns vargai memia bia gratuit, ha uonn mintga commember retschiert in bon per ina bubronda gratuita. Tut quei che vegneva consumau suenter, vegneva incassau.
Buca aschi bia cletg havein nus giu cun l’aura. Ei ha bischau fetg igl entir gi e la via si Ruschein era schliata. Il giug d’avertura da “…e buc emblidar la terschola” e “”Hontas Lumerinas” ha entschiet allas 13:00. Bunamein havessen nus stuiu midar il plan da giug, damai che las empremas squadras ein arrivadas pér paucas minutas avon il giug. La fin finala han lu tuttina tut las 22 squadras anflau ad uras la via si Ruschein.
Ils participonts han consumau bia maglias, aschia che nus havevan gia allas 18:00 negins pauns pistur pli. Stuiu murir dalla fom ha denton negin, damai ch’ei ha dau “sandwitches” entochen l’autra damaun. Il final ei staus tschun minutas avon mesanotg, ed uonn, per la tiarza ga, han las “Hontas Lumerinas” gudignau nies turnier da ballapei cun 1:0 encunter “King Arthur”.
A caschun dallas vias malsegiras, han deplorablamein tuts vuliu ir spert a casa. Cuort suenter il final ein quasi tut ils participonts d’ordeifer serendi a casa. Ils commembers dalla uniun da giuventetgna Ruschein & Ladir han perquei denton tuttina fatg fiasta tochen la damaun baul.
Damai che biars commembers han segidau la dumengia suentermiezdi da far uorden, ei tut stau fatg en fetg cuort temps cun neginas reclamaziuns seriusas.

Silvester / Daniev 2007/2008
Sco decidiu dalla radunonza, essan nus uonn bu ir ell'Alpina a tscheina, mobein havein fatg tscheina per tut ils commenbers en halla plurivalenta. Stephan Hänggi ha organisau in menü tut special. Ei ha dau salata mischedada, pasta cun siat differentas sosas e dessert. Pil da beiber haveva Martin Blumenthal mirau. Nus savevan eleger denter vin, gervosa ed auas. Per animaziun havevan els era procurau cun giugs.
Cuort avon mesanotg, essan nus serendi avon halla, nua che entgins commembers havevan fatg la sera avon ina bar da neiv. Leu deva ei vin cauld e da mesa notg havein nus aviert las butteglias champagner. Entgins dil vitg han era anflau la via tier nossa bar ed aschia havein nus sco giuventetgna era saviu porscher in "cüpli" alla glieud dil vitg.
Silsuenter essan nus stai l'entira notg en halla e pli tard ir per las casadas e fatg viva sigl onn niev, entgins tochen il proxim gi.
Ils 2.01.08 haveinsa lu aunc fatg uorden suentermiezdi. Igl ei stau ina biala e legra fiasta da Silvester.
Bien niev onn!

L'actuara: Cornelia Vinzens