Sontgaclau ils 05-12-09
Tradiziunalmein organisescha l’uniun da giuventetgna Ruschein Ladir mintg’onn la fiasta da Sontgaclau els vitgs da Ruscnein e Ladir. Aschia ei quei ei stau il cass ils 05-12-09.
Igl avonmiezdi essan serimnai en halla a Ruschein per partger si las lavurs per preparar la fiasta. Ina part dils presents ha empleniu si ils sitgets per partger o als affons e tschella part ei serendida en direcziun Ladir per rimnar tortas badugn e ligiar ensemen quellas suenter. Quei ha tut funcziunau bein e tut ei stau semtgau per la sera.
Sco fatg giu dalla radunonza generala han Martin Blumenthal e Gian Caminada fatg Sontgaclaus, ils novizs plus Maria Coray, Serafin Cadruvi e Sandra Caduff han sevestgiu sco fumeglia. La gruppa da Martin ha visitau 11 casadas a “Ruschein vest”, ferton che la gruppa da Gian ha visitau 12 casadas a “Ruschein ost” e Ladir.
Per finir giu la fiasta da Sontgaclau essan silsuenter serimnai ell’ustria Alpina per magliar paun pastur e beiber las gervosas empustadas. La fiasta ha cuzzau sco usitau tochen tard viaden ella notg.
En tut priu san ins tschintschar d’ina fiasta gartegiada e ch’igl usit da Sontgaclau sappi vegnir menaus atras era l’auter onn en semeglionta moda e maniera.

Viagiada silla Greina
Ils 26 da settember 2009 ein endisch alpinistas ed alpinists carrai dalla Val Sumvitg viaden, tgi cun auto privat e tgi cul traffic public e sentupai enta Runcahez, pia vargau l’Erna. Cuort avon miezgi ei la gruppa partida encunter la camona dil Terri nua ch’il liug da dormitori per la proxima notg sesanflava. Suenter ina spassegiai da ca. duas uras dalla Val Sumvitg viaden steva ina spundiva plaunca avon nus, che nus havein rinforzai d’ina tafra marenda surmontau senza incaps. Sisum la plaunchetta spitgava nus in post da zwipf (Zwischenverpflegung) exsistent ord izuns ed ina impressiunonta survesta dalla Val Sumvitg viadora. Cun quei motivai danovamein, havein pauc pli tard contonschiu ca. allas treis  e mesa nossa finamira per quei gi, la camona dil Terri (2170m.s.m.).
L’ustiera dalla camona, ina Tomaschett da Trun, ha beneventau nus e muassau la combra. Suenter haver drezau en la combra era il proxim termin la tschein allas siat. Ils biar han stuiu serevegnir dallas stentas ed ein restai tochen tscheina ella camon. Mo a quater sportists extrems han ils izuns dau aschi bia energia ch’els ein schgamberlai vinavon sil Crest la Greina (2198m.s.m.). Per naven da quei crest han ins finalmein viu il plaun dalla Greina e quei cun ina vesta tutaparti.
Da tscheina ha ei dau suppa, salata, fortem cun buglia da truffels ed ina petta da tschugalatta. Suenter la tschavera da perdanonza essan stai da cuminonza, giugau “maier” ed auters giugs da risaglias, e naturalmein gudiu la calanda fadigiada.
L’autra damaun allas siat uras ha ei giu num “Tagwach”! Quei vul gir, entiefer in’ura havevan tuts ensulviu e selavau ed eran semtgai avon tegia. Suenter haver fotografau la fantastica survesta sil Tödi essan parti encunter il plaun dalla Greina. Arrivai tier la cruschada Plaun la Greina – Pass Diesrut ha ina alpinista communicau ch’ella hagi buca pli la forza d’ir la tura planisada, ella mondi pli bugen gia uss encunter Vrin. Aschia ha la gruppa getga adia ad ella ed a siu acumpignament ed ei semessa aunc en otg sin via encunter il lag dil Piz Terri, sco planisau. In da nus haveva bandunau nus gia la ser’avon ord motivs d’ina collisiun da termins.
Cun in ferm pass essan arrivai cuort avon miezgi tier il lag menziunau (2585 m.s.m.) al pei dil Piz Terri. Cun quei che nus eran vegni aschi bein vinavon, havevan enqualins mustgas da reiver sil Terri. Nus essan alura sedezidi da partger la gruppa. Quater alpinist(a)s ein serrendi directavia sur la Fuorcla Blengias (2718m.s.m.) giu Puzzatsch. Ils auters quater ein sco detg, scarpitschai sil Terri (3149m.s.m.).
Suenter ina stentusa ura e mesa essan finalmein arrivai sil péz, e cul cletg da nossa vart ei schizun la nebla schvanida. Aschia ch'ina survesta nunspitgada ei sepresentada a nus.
Spisgentai dalla marenda ein era ils davos craks serrendi encunter casa...per far cuort; essan era nus ir sur la Fuorcla Blengias denton setschentai giu Vanescha e naven da leu viagiai ora a Vrin. Sco ils auters quater ch’ein la finala sentupai a Puzzatsch (1667m.s.m.) cun l’emprema gruppa da dus e carrai cun autos postals tochen a casa, essan era nus arrivai in’ura pli tard sauns e faszinai da nossas muntognas a Ruschein e Ladir.

Lavur cumina
protocol: datum: 29.08.09
              uras: 5uras 15min  (09.00-12.00 14.15-16.30)
              pers.: 8 luvrer(a)s 

Nus essan serimnai sonda ils 29 d’ uost 2009 allas 9.00 uras sin parcadi baselgia.. Ils 8 presents, cun num; Willi, Bruno, Sabrina, Sandro, Curdin, Luzian e Duri, ein serendi cun autos tochen en tier la punt dalla val da Siat.
Il gliendisgis avon era Duri staus cul president da vischnaunca, Leo Capaul, a prender si las lavurs che duein vegnir fatgas sil trutg naven dil mulin da Siat entochen la via dalla Reisga. Aschia havein nus la sonda gest saviu partger en las gruppas tenor la lavur. Curdin, Ivan, Bruno e Sandro han priu zappun e badel ed ein serendi tier la secunda punt, nua ch’igl era da migliurar il trutg.
Plinavon han Willi e Luzian entschiet da surengiu e Sabrina e Duri da sutsi a schubergiar il trutg. Il trutg era numnadamein plein roma, dascha, caglias e cuschas ch’ eran curdai e restai cun pinar plontas.
Nus havein luvrau mordio entochen las 12.00 uras da miezgi. Cun gronda fom essans bunamein curri giu tier ils autos, nua che ligiongias, paun e mustarda spitgavan sin nus.
Suenter ina cumadeivla grillada ed haver magliau e buiu il venter plein essen allas 14.15 uras puspei turnai alla lavur.
El decuors dil suentermiezgi ein Willi, Luzian, Sabirna e Duri sentupai a miez il trutg. Quei vul gir ch’il trutg ei rumegiaus naven da sum tochen dem. Suenter haver rischlau mintga miscalca e cavau liber finadin dutg essan i si tier ils “miradurs”.
L’autra gruppa ha giu da cavar in niev trutg per remplazzar ina punt marscha. Els han cavau tochen sin grep. Sin quei bien fundament han els alura fatg in super mir schetg ed aschia alzau il trutg sin la dretg’altezia, plus procurau che l’aua dil dutg possi sgurghigliar sutora senza far donns. Sco davos havein tuschau la punt dallas plauncas giu.
Allas 16.25 uras eran tut las lavurs finidas. e nus tschuffs naven da tgau entochen pei. Cuntents cun la lavur prestada havein priu nossas siat caussas ed essen serendi encunter casa.

Sentupada cun l’uniun da giuventetgna Falera ils 22-08-09
Tier la radunonza da primavera havevan nus fatg giu da sentupar cun l’uniun da giuventetgna Falera enzacu egl uost. Aschia ha il comite d’organisaziun consistent ord Curdin Cavegn, Carin Coray, Willi Cadruvi e Gabriel Caderas fixau quella fiasta sin ils 22 da quei meins.
Damai ch’els havevan organisau bein tut per quella fiasta eis ei stau negin problem da baghegiar si tut igl uorden igl avonmiezdi avon ch’entscheiver culla fiasta. Sper la legendara tenda da militar havein nus aunc baghegiau ina bar, semtgau il damagliar e dabeiber e preparau ils giugs.
Il suentermiezdi entuorn las 15:00 han ils emprems da Falera contonschiu il vitg da Ruschein e cun quei l’autra vart dalla val. Els ein vegni beneventai cun in aperitiv. Suenter havein nus partgiu en il presents en gruppas da dus e menau ils giugs che vevan preparau. Blessai ha ei dau negins e perfin la plievgia ha buc saviu lavagar la luna duront traversar igl uaul da Plontabuora en direcziun Davos.
Per emplenir ils maguns havein nus barsau ligiongias e partgiu o salatas sco tscheina. Naturalmein ein las bubrondas buc vegnidas alla cuorta.
Strusch che ils “Käsis” eran tucchegiai havein nus surdau premis allas meglieras treis gruppas dils giugs. Cu quei ei stau fatg ha la fiasta per entschiet endretg ed ha cuzzau per certas persunas tochen ch’ei fageva gis.
La dumengia havein nus lu fatg uorden e tratg il fazit da quell’emperneivla fiasta
.

Fiasta da novizs ils 04-07-09
A caschun dalla fiasta da novizs havein nus priu si uonn 4 novs commembers en noss’uniun da giuventetgna: Ryan Gay, Lucian Bischof, Fadri Cajochen e Flurina Cadruvi.
Allas 10:00 havein nus serimnau per far las preperativas necessarias per la fiasta. Las giuvnas ein stadas responsablas per ils giugs, ils giuvens han baghegiau si la bar e la tenda.
La sera essan nus serimnai allas 18:30 ensemen culs novizs a miez vitg a Ruschein. Leu ha il president Duri Coray fatg in beinvegni a tuts presents. Cun in grond tractor cun car annex essan nus lu carrai tochen a Bual si Ladir. Leu ha mintgin saviu beiber zatgei per far ir il temps tochen che nus havein entschiet culs giugs per ils novizs. Silsuenter han ils novizs sepresentau als commembers.
Pli tard havein festivau tochen tard viaden ella notg e certs tochen ella damaun.
La dumengia suentermiezdi ein aunc inaga plirs commembers serendi tochen a Bual per far uorden e deponer il material els loghens usitai. Cu ei mava gia encunter sera essan lu stai a fin cun tuttas lavurs e vein saviu ir a casa.
Aschia astg’ins tschintschar dad ina gartegiada fiasta da novizs e gia selegrar sin la proxima l’auter onn.

Di da skis sils Fops ils 14 / 15-02-09
Damai che l’aura ha fatg cun quei onn ed ei ha giu neiv sco sablun sper la mar sillas pistas, havein nus saviu menar atras uonn il di da skis sils Fops. Dallas 9 la damuan essan nus carrai cul bus da skis tochen a Murschetg. Naven da leu han las cabinas grondas transportau nus tochen sil Vorab e naven da leu essen nus i tochen giu els Fops cun skis. En tut han 8 persunas separticipau. Damai ch’il prighel da lavinas ha impediu nus dad ir cun skis sin aunc dapliras pistas, vein nus passentau igl entir suentermiezdi sils Fops. Il temps ei ius spert e vonzei essan nus i en tegia per magliar leu spaghettis sco tscheina. Suenter tscheina havein nus sedivertiu cun diversas caussas e tuts ein serendi el decuors dalla notg en letg.
L’autra damaun havein nus buc pli teniu o gitg sils Fops ed essan in en direcziun alp da Ruschein, Crap Masegn e Ruschein / Ladir.
Quei ein en mintga cass stai dus dis gartegiai e damai ch’ei ha dau neginas reclamaziuns davart ils menaders dalla bar sils Fops astga ir o da quei che aschi’in occurenza el medem stil savess vegnir menada atras era l’auter onn.

6avel turnier da ballapei a Ruschein ils 10-01-09
Uonn ha l’uniun da giuventetgna Ruschein-Ladir organisau per la 6avla ga il turnier da ballapei en halla. Era quei onn ei quell’occurenza stada in success. 11 equipas han priu part. Angela Alig, Selina Caderas, Sandro Bleuler e Conelia Vinzens han segidau cun l’organisaziun, tgei ch’ei stau in grond agid per la suprastonza. Era uonn ha mintga commember dall’uniun survegniu in bon per ina bubronda gratuita. Igl emprem giug ha entschiet dallas 13:00, il giug final ei vegnius giugaus punct dallas 21:00. Niev havein nus repartgiu a tuts giugadurs che han separticipau ina
butteglia da beiber en colur dad aur ed als victurs in pocal, construius da Leo Caduff. Ultra da quei havein nus cuschinau spaghettis sil temps da tscheina e tschentau si ina bar sin lautga aunc supplementar sper quella el foyer. Quella sin lautga ha denton bu valiu ils fiars dil giavel.
Suenter che tut ils giugs ein stai giugai ein certas equipas serendidas a casa, denton surprendentamein ein biaras persunas aunc stadas in amen ed ensemen vein nus festivau ina fiasta relativ intensiva tochen exact las 5:00 la damaun. Lu ein era quels che han teniu o tochen lu caminai a casa.
Damai che biars commembers han segidau la dumengia il suentermiezdi da far uorden, ei tut stau rugalau en cuort temps.

 

Igl actuar: Marco Cavegn