7avel turnier da ballapei a Ruschein ils 16-01-2010

Sco ei ha gia tradiziun dapi igl onn 2004 havein era organisau egl onn 2010 entschata schaner il turnier da ballapei en halla a Ruschein. La sonda avonmiezdi havein entschiet dallas 9:00 a semtgar igl uorden per il turnier. Quei ha buc cuzzau immens gitg e tut ei stau rugalau ualti spert damai ch’il comite d’organisaziun ha giu planisau ed organisau tut bein gia ordavon. Per separticipar al turnier han 10 equipas s’annunziau. Tut quellas 10 squadras ein lu e effectiv vegnidas a Ruschein ed han giugau per saver prender a casa il bucal ambulont, ni silmeins in migiel da “cafe Lutz “che mintga participont ha survegniu. Il niveau da ballapei els giugs ei staus plitost aults ed igl ei buc vegniu giugau extrem grop. Ferton ch’ils arbiters han schulau ils giugs, han ils speakers priu si ils resultats e teniu il temps, tut las persunas davos la bar ed il buffet han partgiu o dabeiber ed il damagliar ch’ei vegnius cuschinaus e semtgaus en cuschina ed ils allrounders han mirau per uorden ellas tualettas, cabinas e sillas meisas. Tut ei gartegiau senza difficultads ed era el giug final denter “King Artur” e “90, 91; mellimelli” ha ei dau neginas blessuras.
Damai che pliras equipas han gia bandunau il bi vitg da Ruschein avon che giugar il giug da rang, havein schau giugar il final e menau atras la rangaziun pli baul che planisau. Cuort suenter la rangaziun ein era las davosas equipas serendidas en in auter liug. Denton era cun in pign diember da persunas ha la fiasta aunc cuzzau tochen gitg viaden ella notg. La dumengia ei vegniu fatg uorden en halla e vendiu la rauba restada che havein buc saviu dar anavos nua che havevan empustau. La pedella ha priu giu la halla ed aschia ei era il turnier 2010 gia staus historia. Il diember da squadras che participeschan al turnier pren giu dad onn tier onn, tgei che po forsa far empau mal il tgau, denton en tut priu ei era quei turnier gartegiaus bein.


Di da skis sils Fops ils 13 / 14-03-10

Ils 13 e 14 da mars 2010 havein organisau ils gis da skis sils Fops. Damai che biars commembers han mussau munconza da presenza, essan mo stai en 5.
La sonda avonmiezdi essan serendi dallas 9:00 culla posta tochen a Laax, Murschetg. Silsuenter essan vegni transportai cun las gondlas e sutgeras tochen sil glatscher dil Vorab. Naven da leu essan carrai sin nos skis tochen tier la tegia dils Fops, nua che Andi e Gabi Bisquolm meinan la bar. Damai che l’aura e las cundiziuns da neiv han schau tier ei, essan aunc i cun skis tochen viaden el suentermiezdi. Cu las combas dulavan ed il regl da guder in per schlucs calanda era vida crescher essan lu aunc inaga serendi tochen tier la tegia dils Fops. Leu havein fatg ir il temps cun differents giugs e differentas acziuns, sco dar curling. Cu il magun ha entschiet sgurghigliar, havein cuschinau spaghettis cun sosa da tomata e magliau quels. Suenter haver lavau giu, havein tratg vi il temps cun dar giugs ed essan serendi baul la damaun dils 14 da mars els sacs da durmir per ruassar.
Suenter haver durmiu inper uras essan lu puspei secavigliai e havein sesemtgau per bandunar la tegia dils Fops. Ryan, Reto e Marco ein direct i “surengiu” ed a casa, Ivan Coray e Curdin han aunc adina buc giu avunda da skis e neiv ed ein aunc i
inper uras cun skis.
Il budget da 500.- frs. (quei diember corrispunda a 25 taxas annualas) che havein giu a disposiziun ei buc vegnius duvraus si diltut.
Viu sur tut o, sansa era uonn puspei tschintschar da gis da skis gartegiai, schegie che biars commembers dalla UGRL han buc propi giu gust da separticipar.

 

Fiasta da novizs ils 03-07-10


A caschun dalla fiasta da novizs havein nus priu si uonn 2 novas commembras en noss’uniun da giuventetgna: Jessica Giger e Saskia Del Zotto.
Allas 10:00 essan nus serimnai per far las preperativas necessarias per la fiasta. Las giuvnas ein stadas responsablas per ils giugs, ils giuvens han baghegiau si la bar.La sera vein fatg giu allas 18:30 ensemen culs novizs a miez vitg a Ruschein. Leu ha il president Ivan Coray fatg in beinvegni a tuts presents. Silsuenter essan serendi a Bual. Leu ha mintgin saviu beiber zatgei per far ir il temps tochen che nus havein entschiet culs giugs per las novizzas ch’eran sevestgidas sco Bud Spencer e Terrence Hill.Pli tard havein festivau tochen tard viaden ella notg e certs tochen ella damaun.
La dumengia suentermiezdi ein aunc inaga plirs commembers serendi tochen a Bual per far uorden e deponer il material els loghens usitai. Cu ei mava gia encunter sera essan lu stai a fin cun tuttas lavurs e vein saviu ir a casa. Aschia astg’ins tschintschar dad ina gartegiada fiasta da novizs e gia selegrar sin la proxima l’auter onn.

Viadi a Roma

Igl atun 2010 ei l’uniun da giuventetgna Ruschein-Ladir hurti serendida a Roma per visitar nies president anteriur, Duri Coray. Aschia ein 12 commembers serimnai ils 8 da settember equipai cun bagascha per surviver quater gis a Roma. Naven din sacados tochen ina scaffa da resti cun rodas eran tuttas grondezias representadas. A Bellinzona havein nus giu cuort temps per ina gervosa da tancar curascha per cuntinuar il viadi cul Pendolino encunter Milaun. Duas gervosas pli tard eran nus gia a Roma el hotel. Gl’emprem avonmiezgi ein las baselgias da San Giovanni in Laterano e Santa Maria Maggiore stadas sil program. Il suentermiezgi essan nus sentupai cun Duri. El ha menau nus atras il quartier dalla guardia. Il temps ch’el ha giu da luvrar ha il rest nazzegiau per far in sitg, avon che nus essan ir cun Duri a tscheina. Strapazzai dil viadi essan nus semetti sin via el hotel, ils ins cun, ils auters senza ina cuorta fermada en ina bar.

Il vendergis avonmiezgi vein nus contemplau il castel Sant’Angelo. Tgei che sto dispet vegnir menziunau en quei connex ei che quei ei stau il sulet dils baghetgs che nus vein visitau nua ch’ins ha saviu empustar ina gervosa. Per haver il sentiment da turist ultimativ ha ei dau ils suentermiezgi ina tura cun in bus aviert atras Roma. Denter auter havein nus viu la Piazza Navona, il Forum Romanum, il Colosseum e la Piazza Venezia. Aschia ei il temps currius ed igl era gia puspei temps da prender in apero datier dalla Piazza Navona per esser semtgai sin tscheina. Suenter ina detga tscheina ha la sortida astgau vegnir ina crena pli groppa che la sera avon, aschia ch’ei fageva gia clar culs davos ein sederschi en letg.

Zaichs sco ins ei ha la pluralitad dils participonts era surviviu quella sera, aschia che Duri ha saviu muossar a nus ils curtgins dil vatican. Suenter ina cuorta pausa da regeneraziun han las forzas era tunschiu per mirar la basilica da S. Pieder, medemamein menai entuorn da Duri. Plein bunas regurdientschas dalla tura cun bus dil gi avon havein nus aunc fatg la secunda part dalla tura, avon che ir a tscheina. Damai ch’igl era la davosa sera ha quei culla tscheina stuiu ir in tec hurti, buc che la sortida vegni alla cuorta. Suenter ina spassegiada dalla piazza Navona spel Pantheon encunter la fontana di Trevi ed in ni dus sitgs era ei gia temps da prender cumiau da Duri e plaunsiun patertgar vid ir a letg.

La dumengia eis ei puspei stau da prender la via resp. las rodaias sut il peis e serender encunter la Svizra. Quei ei iu in bien ton pli hurti ch’il viadi engiu, aschia che nus eran cuort avon las 2000 gia puspei a Ruschein. 


Igl actuar: Marco Cavegn