Til Agrischa 2011 - la Surselva sepresenta

Ils 10 d'avrel ha in til sut il tema 'la Surselva sepresenta' giu liug a Glion. Sper diversas autras uniuns ein era entgins commembers dall'uniun da giuventetgna Ruschein-Ladir sedecidi da prender part a quei til. Il tema ei gleiti staus anflaus. Ils participonts han seregurdau da lur competenzas-clav e constatau ch'els san beiber gervosa e dar jass. Aschia ha l'annunzia cul motto ‚jass da nos perdavons' anflau la via a Glion. Gust dad i a pei atras il til haveva naturalmein negin, aschia che la tscherca din vehichel adattau ha entschiet. Quella ha anflau ina fin tiel motor dalla famiglia Cavegn. Per drizzar en e decorar la punt da quei vehichel ein ils participonts serimnai cun ina motivaziun extraordinaria ina sonda avonmiezgi.

La dumengia endamaun ein las giuvnas ed ils giuvens - numnadamein Sabrina, Carin, Curdin, Willi, Ryan, Christian, Bruno, Ivan e Gabriel puspei serimnai per carrar encunter Glion. Inaga dapli ha ei semuossau, daco ch'ins duess buc fixar termins silla dumengia endamaun sch'il ei buc necessari. Dus ch'eran el stan dad ir cun auto han denton tuttina seschau anflar. Arrivai a Glion ei la decoraziun vegnida montada e las gervosas grondas plazzadas aschia che negin stoppi endirar seit. La bandiera dalla cumpignia da bucs ha naturalmein era buc astgau muncar. Allas 10:30 uras ha il til entschiet. Plein motivaziun ha nies manischunz Gabriel mess en moviment il motor e transportau ils giugadurs da jass atras il marcau. Ina duas zachergiadas han naturalmein era buca astgau muncar per representar quei giug sin ina moda realistica. In stop silla cruschada ha dau caschun da smaccar vi in jass en loghens meins usitai. Entginas grondas pli tard ha il til anflau ina fin ed ils participonts ein semess sin via per encurir la giogia meritada. Arrivai a Ruschein ei il material puspei vegnius demontaus e l'occurrenza ei ida a fin.

Sera dil vitg 07-05-2011

Ils 07-05-2011 havein organisau per l’emprema gada ina sera dil vitg en halla plurivalenta Ruschein ensemen cun autras uniuns dil vitg. Il comite d’organisaziun existent ord Martin Blumenthal, Ivan Coray, Willi Cadruvi e Curdin Cavegn ha preparau ed organisau la fiasta.
Igl avonmiezdi essan serimnai en halla per metter ora meisas e far autras lavurs preparativas per la fiasta. Gia il venderdis haveva il comite d’organisaziun installau igl indrez per tedlar musica ed il beamer. Aschia essan stai a fin fetg spert la sonda cun tuttas lavurs.
Denter las 14 :00 e las 16 :00 havein dau jass. En tut han 16 persunas separticipau a quei turnier da jass per plascher. Ils affons han saviu sittar el stand da 10 m e far auters giugs e parcours sin plaz tgietschen. El stand da sittar han Giusep ed Ivan Arpagaus instruiu ed accumpignau ils affons, sin plaz tgietschen han Gieri Arpagaus, Roger Vetsch, Christian Caderas e Bruno Cadruvi priu il temps e notau ils puncts contonschi dils affons.
Naven dallas 17:00 han las dunnas fatg pizzas el fuorn sper la halla plurivalenta e grillau da tuttas sorts ligiongias. Las pizzas han gustau excellent ed aschia ei la damonda suenter quellas pizzas stada fetg gronda.
La sera havein fatg ina pintga rangaziun dallas concurrenzas dil suentermiezdi e suenter cuntinuau cun 3 blocks da films, sketchs e cant. Ils sketchs han Liliane Vinzens, Cornelia Vinzens e Nicole Cadruvi preparau e mussau. Maria Cadruvi e siu um Andreas Joos han priu si videos cun 12 differentas persunas dil vitg che han raquiuntau pintgas historias sur da differents temas. Cantau han ils affons da scola ed il chor mischedau da Ruschein.
Naven dallas 22 :00 havein aviert la bar e surviu gervosa ed autras bubrondas alcoholicas tochen tard la damaun.
Per far uorden essan sentupai la dumengia dallas 14 :00 ed era quei ha funcziunau fetg bein, aschia che havein buc duvrau gitg per schubergiar e metter ensemen igl  uorden.
Ins sa tschintschar dad ina fiasta fetg gartegiada che ha purschiu zatgei per affons tochen seniors e damai che bunamein tuttas uniuns dil vitg ein stadas involvadas, ha fetg bia glieud priu part alla fiasta dil vitg 2011.

Fiasta da novizs

Viadi a Schänis

Sontgaclau